Jump to content

పుట:పంచతంత్రము (దూబగుంట నారాయణ).pdf/105

వికీసోర్స్ నుండి
ఈ పుట అచ్చుదిద్దబడ్డది


సీ.⁠

కలికిచూపులకాంతిఁ గలువతోరణములు, పచరించినట్లున్న బాలఁ జూడు
మెఱుఁగుఁజెక్కిళ్లను మించుటద్దంబులఁ, జూపెడు నీకు నీసుదతిఁ జూడు
గురుకుచంబులు పూర్ణకుంభంబులునుబోలె, నిలిపిన ట్లున్నయీనెలఁతఁ జూడు
చిఱునవ్వు వెన్నెల శీతలామృతమట్లు, చిలుకుచు నున్న యీచెలువఁ జూడు

⁠


గీ.⁠

నమరవల్లభ నీకైన నమరుఁ గాని, నరసురాసురయక్షకిన్నరవరులకు
నీడు గా దని నిలిపితి నీమృగాక్షిఁ, గోర్కి నిగుడంగ దీనిఁ జేకొందు గాక.

⁠ 262


వ.⁠

అని యిట్లు మహేంద్రునకు నన్నారీరత్నంబుపయిం బ్రియంబు పుట్టం బల్కిన తప
స్విం గనుంగొని దానిజన్మప్రకారంబును మునీంద్రునకుం గలిగిన వాత్సల్యంబును నెఱిం
గినవాఁడై నవ్వుచు మునీంద్రునకు నింద్రుం డిట్లనియె.

⁠ 263


చ.⁠

సురుచిరరత్నసానువుల శుద్ధసువర్ణమహోన్నతాయత
స్ఫురదురుశృంగసంఘముల సూర్యసుధాకరతారకానిరం
తరపరివర్తనంబుల గదాధరపద్మభవాదిదేవతా
పరిచితమౌళిభాగములఁ బ్రస్తుతి కెక్కి వెలుంగు నెంతయున్.

⁠ 264


ఉ.⁠

మేరుమహామహీధరము మీకును మాకును బెద్ద గావునన్
వారిరుహాక్షి నగ్గిరి కవశ్యము నిచ్చుట మేలు కాంతకుం
గోరిక వల్లభుండు ధనికుండును సత్వయుతుండుఁ గాఁగ మే
లారసి కాంచనాద్రికిఁ బ్రియంబున నిమ్మని యింద్రుఁ డేఁగినన్.

⁠ 265


వ.⁠

అమ్మునీంద్రుండు తనమనంబున.

⁠ 266


గీ.⁠

పిలిచి యీఁబోవ నెవ్వారు దొలఁగనాడి, పడుచు నొల్లమి లోకంబుపాడి గాదె
భాస్కరానిలస్వర్లోకపతులు దగిన, యొరపు చెప్పిరి గాని తా రొల్లరైరి.

⁠ 267


వ.⁠

ఒల్లకున్న నేమి యగు నని మహామేరువుం దలంచిన నమ్మహీధరంబును నత్యంతసుకు
మారత్వంబును ధరియించి యాతనిముందట నిల్చినం గనుంగొని యర్హసత్కారంబులఁ
బరితుష్టుం జేసి మునీంద్రుం డిట్లనియె.

⁠ 268


గీ.⁠

ఎవ్వరికి నీక నీకు నే నిత్తు ననుచు, నింతగాఁ బెంచినాఁడ నీయిందువదన
నింపు సొంపార నీవు మాయింట నీపుడు, వియ్య మొందంగవలయు నుర్వీధరేంద్ర.

⁠ 269


వ.⁠

అన నమ్మహీధరం బిట్లనియె.

⁠ 270


గీ.⁠

చూడ సూక్ష్మంబు గాని నా సొబగుమేను, ఘాతగొని పెక్కు లాఁగలు గాఁగఁ ద్రవ్వు
గాన నాకంటె నధికమై ఘనతఁ చేర్చు, వేషధారిణి యైనయిమ్మూషికంబు.

⁠ 271


ఉ.⁠

కావున నీకుమారికకుఁ గాంతుఁడు మూషిక మైన నొప్పుఁ గా
కీవగ గాఁగ నల్పులకు నిచ్చుట నీ కది బుద్ధి గాదు నన్
బోవఁగ నంపు మంచు మునిపుంగవు వీడ్కొని మేరు వేఁగినన్
దేవసమానవిప్రునకు దీని నొసంగెద నంచు వేడ్కతోన్.

⁠ 272