ఈ పుట ఆమోదించబడ్డది
విరాటపర్వము - ఆ -1
ప్రాకటంబుగ నేఁటిపయనంబునందు
నీకు బొంకఁగ నేల నేను నొచ్చితిని.
ఓపి యీతనుమధ్య నొకయింత దవ్వు
ఏపు మీఱంగను నెంతయుఁ బ్రీతి
మూపుపై నిడికొని మోఁచి తెచ్చినను
నీ పేరుగా నొక్క నెలవు సేరుదుము."
అనవుడు నౌఁ గాక యని సవ్యసాచి
తనభుజంబులమీఁదఁ దరళాక్షి నునిచి
తామరఁ గొని తెచ్చుదంతి చందమునఁ
బ్రేమతో నే తేరఁ బృథివీశుఁ డపుడు
పురముఁ జేరితి మంచుఁ బురగోపురములు
సొరిదిఁ దమ్ముల కెల్లఁ జూపి యిట్లనియె:
పాండవులు తమయాయుధముల దాఁప నిశ్చయించుట.
"ఈదేహకాంతులు నీయాయుధములు
ఆదట ధరియించి యటఁ బోవ రాదు:
తగినరూపంబులు దాల్చి కైదువుల
నొగి దాఁప వలె నింక నొక్క దాపునను.
ఈగాండివముఁ గన్న నెఱుఁగరే మనల
బా గైన పెనుపాము భంగి నొప్పెడిని.
