ఈ పుట ఆమోదించబడ్డది
రేకు: 0163-04 ముఖారి సం: 02-303 వేంకటగానం
పల్లవి: సర్వేశ్వరా నీతో సరి యెవ్వరు
పూర్వపువారు చెప్పఁగాఁ బూఁచి కొలిచేఁ గాని
చ. 1: చేరి వేదములు నిన్నుఁ జెప్పఁగా వినుటే కాని
నీరూపము దర్శించేవార లెవ్వరు
ధారుణిలో నీయవతారాలే చూచుట
ధీరత నీమహిమలు తెలిసేవా రెవ్వరు
చ. 2: భూమివారిఁ జూచి నిన్నుఁ బూజలు సేయుట గాని
కామించి నీతో మాటాడే ఘను లెవ్వరు
దీమసాన నీ దాసుల ద్రిష్ట మెరుగుట గాని
యీమేర నీ దైవిక మెరిగే వా రెవ్వరు
చ. 3: వరములు నీ వియ్యఁగా వచ్చి సేవించుట గాని
కెరలి నీమూర్తి వెదకేవా రెవ్వరు
హరి శ్రీవేంకటేశా నీకరుణవారౌట గాని
అరసి నిన్ను సుద్దులడిగేవా రెవ్వరు