ఈ పుట అచ్చుదిద్దబడ్డది
రేకు: 0202-02 ధన్నాసి సం: 03-008 గురు వందన, నృసింహ
పల్లవి:
పుట్టినట్టె వున్నవాఁడ పోలేదు రాలేదు
ఇట్టె నీ దాసుఁడ నైతి యెంగిలెల్లఁ బాసె
చ. 1:
వెలినున్న జగమెల్ల విష్ణుఁడ నీ మహిమే
అలరి నాలోన నీవే అంతరాత్మవు
తెలిసి నేనున్నచోటే దివ్యవైకుంఠము
వెలలేని నరకముల వెరపెల్లఁ దీరె
చ. 2:
తనువుతో నుండేది నీ తలఁచిన తలఁపేనా
మనుపు సంసారము నీమాయ చేతిదే
పనులనా కర్మము నీ పంచినట్టి పనుపే
మనసు లోపలి యనుమానమెల్లఁ బాసె
చ. 3:
తెరమరుగు దినాలు దేవుఁడ నీ కల్పితమే
సొరిది యీ సురలెల్ల చుట్టాలే నాకు
నిరతి శ్రీవేంకటేశ నీమరఁగు చొచ్చి నేఁడు
గురుని యానతిచేతఁ గొంకులెల్లా బాసె