ఈ పుట అచ్చుదిద్దబడ్డది
రేకు: 0211-05 సాళంగనాట సం: 03-065 అద్వైతము
పల్లవి:
ఏ దెస మోక్షము లేదు యెవ్వరికి ననేరు మీ-
వేదాంత శ్రవణము వెట్టికిఁ జేసేరా
చ. 1:
అంతా బ్రహ్మమైతే నాతుమా వొక్కటియైతే
చింతింప గురుఁడు లేఁడు శిష్యుడూ లేఁడు
బంతినే ముక్తుఁడూ లేఁడు బద్దుఁడూ లేఁడిట్లయితే
వంతుల సత్కర్మమెల్ల వఱతపాలాయఁబో
చ. 2:
యిహమెల్లాఁ గల్లనేరు యేఁటికిఁ బుట్టినవారు
సహజమే యిదనేరు చావనేఁటికి
మహి మీకు బోధించిన మహాత్ము శంకరాచార్యుఁ-
డహరహ మేమైయున్నా నాతనికేది గతి (?)
చ. 3:
కొందరికి సుఖమిది కొందరికి దుఃఖమిది
యిందుఁ జిక్కి బ్రహ్మమునకీ ఘోరమేలా
అందిన శ్రీవేంకటేశుఁ డంతరాత్ముఁ డొక్కఁడింతే
మందలించి కొలువరు మంటికా మీ జ్ఞానము
