ఈ పుట ఆమోదించబడ్డది
రేకు: 0245-06 సామంతం సం: 03-259 నామ సంకీర్తన
పల్లవి:
ఇంతకంటె ఘన మిఁక లేదు
సంతతసౌఖ్యము జనార్దనుఁడే
చ. 1:
భయనివారణము పరమాత్ముని నుతి
జయకారణ మీశ్వరచింత
అయుతపుణ్యఫల మచ్యుతునిసేవ
క్రియతో నిజ మెరిఁగినవారికిని
చ. 2:
కర్మహరము శ్రీకాంతు దరిశనము
ధర్మరాసి మాధవుశరణు
అర్మిలి సంపద లనంతుని తగులు
నిర్మలముగఁ బూనిన దాసులకు
చ. 3:
ఆగమోక్తమీ హరికైంకర్యము
భోగము విష్ణునిపూజ యిది
యోగము శ్రీవేంకటోత్తముని కొలువు
బాగులు నేర్చిన ప్రపన్నులకును
