ఈ పుట ఆమోదించబడ్డది
రేకు: 0231-05 దేసాళం సం: 03-178 కృష్ణ
పల్లవి:
ఏమనఁగ వచ్చునమ్మ ఇటువంటి వారిఁ జూచి
కామించి గోపికలెల్లాఁ గాచుకున్నా రదివో
చ. 1:
రోలఁ గట్టుపడ్డవాఁడు రోఁకలి పట్టినవాఁడు
వేళలేదు వెన్నలెల్ల వెరఁజాడేరు
వేలఁ గొండెత్తినవాఁడు వేరే యేరుసేసేవాఁడు
బాలులవలెనే వీధిఁ బారాడేరు వారివో
చ. 2:
కాటుకమైచాయవాఁడు కప్పురపువన్నెవాఁడు
కూటము గూడుక జోడుకోడెలైనారు
నీటుఁ బైఁడికోకవాఁడు నీలికాశతోడివాఁడు
తేటలై దూడలఁ గాచి తిరిగేరు వారివో
చ. 3:
చేరి చీరలిచ్చువాఁడు చెలిఁ గుంగించినవాఁడు
ధీరులై రేపల్లెలోనఁ దిరిగేరదే
యీ రీతి శ్రీవేంకటాద్రి నిద్దరును నేకరూపై
కోరినవారి వరాలు కొల్లలిచ్చే రదివో