ఈ పుట ఆమోదించబడ్డది
రేకు: 0229-06 పాడి సం: 03-167 శరణాగతి
పల్లవి:
నేరనైతి నింతేకాక నే నిన్నాళ్లు
యే రీతి విచారించినా నిదివో నిశ్చయము
చ. 1:
నాకుఁగా వేరొకరు విన్నపము సేసేరా నీకు
వాకుచ్చి నేనే ఆడవలెఁ గాక
యీకడ నాకంటే హీనునిఁక నీవు గా(ం)చేవా
శ్రీకాంతుఁడ యిఁక నీ చిత్తమింతే కాక
చ. 2:
నీవల్ల బతుకలేక నేనొకరి వేఁడేనా
వావిరి నిన్నే కొసరవలెఁ గాక
నీ వితరణగుణము నీలోనే దాఁచుకొనేవా
సోవ నావంటివారికిఁ జూపవలెఁ గాక
చ. 3:
తల్లికి లేని ముద్దు దాదికిఁ గలదా మరి
చెల్లుబడి నీవే దయ సేయుటఁ గాక
తొల్లె శ్రీవేంకటేశ్వర తూరి నాలో నున్నాఁడవు
చల్లఁగా నీ చనవిచ్చి జరుపుటఁ గాక