ఈ పుట అచ్చుదిద్దబడ్డది
చి. శృం. రేకు: 03-2 కేదారగౌళ సం: 10-013
పల్లవి:
వలపించనేరుతువు వడి నేఁచనేరుతువు
సిలుగు కోప నీవు నేసినట్టె సేయరా
చ. 1:
ప్రియముతోడుత నన్నుఁ బిలిచేవు యీ
నయమె యీడేర నడపేవా
బయకారించే నీచే బడలితిని నీ
చెయి మీఁ దింతె నీవు సేసినట్టె సేయరా
చ. 2:
దగ్గరి నాతో మంచితన మాడేవు యీ
నిగ్గుల నీమే లిట్టె నిలిపేవా
వెగ్గళించే నీచేత విసిగితిని నాకు
సెగ్గెము గాదు నీవు సేసినట్టె సేయరా
చ. 3:
కలసితి నన్ను శ్రీవెంకటనాథుడా నీ
తలఁపులో దయ నాపైఁ దప్పేనా
యెలయింపు నీచేత నింతైతిని నాపై
చెలిమిగలవు నీవు సేసినట్టె సేయరా
