ఈ పుట అచ్చుదిద్దబడ్డది
చి. ఆ. రేకు: 0002-06 బౌళి సం: 10-011
పల్లవి:
బ్రహ్మఁగన్న వాఁడు పసిబిడ్డ
బ్రహ్మమైనవాఁడు పసిబిడ్డ
చ. 1:
వగపులేక చంపవచ్చిన బూతకి
పగసాధించినవాఁడు పసిబిడ్డ
పగటునఁ దనమీఁదఁ బారవచ్చినబండి
పగులఁ దన్నినవాఁడు పసిబిడ్డా
చ. 2:
గుట్టున నావులకొరకు వేలనె కొండ
పట్టి యెత్తినవాఁడు పసిబిడ్డా
జెట్టిపోరునఁ దన్ను జెనకవచ్చినవానిఁ
బట్టి చంపినవాఁడు పసిబిడ్డా
చ. 3:
మిడికెటికోపపు మేనమామఁ బట్టి
పడనడిచినవాఁడు పసిబిడ్డా
కడువేగ శ్రీవెంకటనాథుఁవై గొల్ల
పడఁతులఁ గూడినాఁడు పసిబిడ్డా
