ఈ పుట అచ్చుదిద్దబడ్డది
రేకు: 0315-3 దేసాళం సంపుటం: 11-087
పల్లవి: ఎన్నడు నీ దయ మాపై నిఁకఁ బెట్టేవు
తిన్నని యెడమాటలఁ దెల్లవార వచ్చెను
చ. 1: కొంగు వట్టినవాఁడవు గుట్ట గొంత నడుపేవు
అంగవించి జాణవు గా వని యందునా
చెంగట నిందరిలోన సిగ్గుపడి వుందానను
వుంగిటి దీరనివేళ నూరడించ వలదా
చ. 2: చెక్కు నొక్కినవాఁడవు చెప్పవు ఆమీఁదిమాట
లెక్కించి నీ ప్రేమ నాపై లే దందునా
తక్కక యాపనులకె తలవంచుకుందానను
అక్కరతో యీవేళ నాదరించ వలదా
చ. 3: యియ్యకొన్నట్టివాఁడవు యెదురు చేయి చాఁచేవు
నెయ్యపు సరసములు నేర వందునా
యియ్యెడ శ్రీవెంకటేశ యిందుకె కూడుందానను
వొయ్యన నీ మన్ననల నోలలార్చ వలదా