ఈ పుట అచ్చుదిద్దబడ్డది
రేకు: 0314-4 రామక్రియ సంపుటం: 11-082
పల్లవి: ఇచ్చకుఁడ విన్నిటాను యే మంటివి
యెచ్చరించే నింతె నిన్ను యే మంటివి
చ. 1: కాంత నిన్నుఁ దెమ్మనఁగఁ గాచుకున్నదాన నేను
యింత వొద్దాయ నింక నే మంటివి
చింతతో నెదురు చూచి సేసవెట్టె నంటా నీకు
యెంత లేదు నీకు బని యే మంటివి
చ. 2: ఆకె నీకడ నున్న అంపఁగా వచ్చితి నేను
యేకచిత్తమున నిట్టె యే మంటివి
లేకలు నీకడ కంపె లేచి విచ్చేయఁగదవయ్య
యేకతాన నప్పుడు నీ వే మంటివి
చ. 3: కొమ్మ లోననుండి వచ్చి కొంగు వట్టి నిన్నుఁ దీసె
యిమ్ముల నీ మొగమాట నే మంటివి
సమ్మ తై శ్రీవెంకటేశ సరుగఁ గూడితి రిదె
యిమ్మనీ విడెము నిన్ను నే మంటివి