ఈ పుట అచ్చుదిద్దబడ్డది
రేకు: 0301-2 పాడి సంపుటం: 11-002
పల్లవి: ఏమి బాఁతి నే నీకు యిటు నాకె దక్కితిని
దోమటి నిందుకె పో నీ తొత్త నైతి నేను
చ. 1: మన్నించి విచ్చేసితివి మా యింటికి నేఁడునీవు
కన్నుసన్న నేసితేనె కా దన వైతి
పిన్నదాన నవక నా ప్రియమె చేకొంటివి
యిన్నేసి నావలపుల కెల్లా లోనైతివి
చ. 2: తప్పక చూచినంతలో దగ్గరి కూచుండితివి
కప్పురవిడె మిచ్చితేఁ గైకొంటివి
చెప్పినట్టల్లాఁ జేసి చేఁతలకు గురైతివి
యిప్పుడు నా యంకెలకు యియ్యకో లైతివి
చ. 3: గక్కనఁ గాగిలించితే కన్నులు దేలించితివి
పక్కన నా రతులకు భ్రమసితివి
యిక్కువ శ్రీవెంకటేశ యిందునె నన్ను గూడితి
మిక్కిలి నాయెడ కూనుమేలువాఁడ వైతివి
