ఈ పుట అచ్చుదిద్దబడ్డది
రేకు: 0302-5 రామక్రియ సంపుటం: 11-011
పల్లవి: సిగ్గరి చెలులము నీచిత్తము వచ్చునో రాదో
యొగ్గులు తప్పు లెంతుము యింతేసికి నోప
చ. 1: చనవు లెల్ల నెరపి సలిగెలఁ బొరలుచు
ననుపు నీ కాపె సేసీ నాయెదుటనె
మనసు వచ్చు నీ కది మాకు నిన్ను నన నేల
చెనకి యింకా బనులు నేయించుకో నీవు
చ. 2: తగులాలు చెప్పుకొని దండ నుండి కుంచ వేసి
నగీ నాపె నితోను నాయెదటనె
జిగి నీకు బ్రియ మిది చింతలు రేఁచఁగ నేల
వొగరు లే కింకా నందె వోలలాడు నీవు
చ. 3: అంటి మేను దాఁకించి ఆకుమడిచి నీ కిచ్చి
నంటు సేసీ నీతోను నాయెదుటనె
గొంటవై శ్రీవెంకటేశ కూడితిని నన్ను నిట్టె
దంటతనమున నవి తలఁచుకో నీవు
