పుట:తాళ్ళపాక పదసాహిత్యం - నాలుగవ భాగం.pdf/57

రేకు: 0310-02 శ్రీరాగం సం: 04-056 వైష్ణవ భక్తి

పల్లవి :⁠

కాకున్న మాపాటు కడమున్నదా నీకృపవంకనే నిలిచితిఁగాక

⁠

చ. 1:⁠

యీ నాలికేకాదా యిందరి నిందించినది శ్రీనిధి నిన్నుఁ బొగడి చెలఁగెఁ గాక నానాపాపములు విన్న నా వీనులే కావా దానవారి నీ కథల ధన్యమాయఁగాక

⁠

చ. 2:⁠

యీ మేనేకాదా హేయపుటింతులఁ గూడె నీముద్రలు ధరియించి నిక్కెఁగాక యీ మనసేకాదా యిన్నిటిపైఁ బారినది కామించి నిన్నుఁ దలఁచి కట్టువడెఁ గాక

⁠

చ. 3:⁠

యీ పుట్టుగేకాదా హీనాధికములఁ బొందె వోపి నీ దాస్యము చేరి వొప్పెఁగాక యేపున శ్రీవేంకటేశ యిన్నినేరములు నాకుఁ బాపఁగా నే నిన్ను నమ్మి బ్రదికితిఁగాక

⁠