ఈ పుట అచ్చుదిద్దబడ్డది
రేకు: 0380-04 సామంతం సం: 04-467 హనుమ
పల్లవి:
కలశాపురముకాడ కందువ సేసుకొని
అలరుచు నున్నపాఁడు హనుమంత రాయుఁడు
చ. 1:
సహజాన నొక జంగ చాఁచి సముద్రము దాఁటె
మహిమ మీరఁగ హనుమంతురాయఁడు
యిహమున రాము బంటై యిప్పుడూ నున్నవాఁడు
అహరహరమును దొడ్డ హనుమంత రాయఁడు
చ. 2:
నిండు నిధానపు లంక నిమిషాన నీరుసేసె
మండిత మూరితి హనుమంత రాయఁడు
దండితో మగిడివచ్చి తగ సీత శిరోమణి
అండ రఘపతి కిచ్చె హనుమంతరాయఁడు
చ. 3:
వదలని ప్రతాపాన వాయుదేవు సుతుఁడై
మదియించినాఁడు హనుమంత రాయఁడు
చెదరక యే పొద్దు శ్రీ వేంకటేశు వాకిట-
నదివో కాచుకున్నాఁడు హనుమంత రాయఁడు
