ఈ పుట అచ్చుదిద్దబడ్డది
రేకు: 0362-01 లలిత సం: 04-363 అంత్యప్రాస
పల్లవి:
హరిహరి యిందరికి నబ్బురముగాని యిది
పరగ నీ దాసుఁడే పరతత్వవేది
చ. 1:
పొలసి మశకమండుఁ బొడమేటి జీవుని
తలఁపు బ్రహ్మాండాలు దాఁటిపోయీనీ
నిలువెంత నీఁటెంత నీమాయ లివి భువి
బలిమిఁ దెలియువాఁడె పరతత్వవేది
చ. 2:
తగిలి చూచిన నాత్మఁ దనుఁ గానరాదుగాని
జగమెల్ల దానైతే సరి గనీని
చిగురెంత చేగెంత శ్రీపతి యిందులో నీ -
పగటు దెలియువాఁడే పరతత్వవేది
చ. 3:
యేవంకఁ దనబుద్ది యెక్కడనుండునోకాని
శ్రీ వేంకటేశ నిన్నుఁ జింతించీని
పూవెంత ఫలమెంత పురుషోత్తముఁడ నీ -
భావమెరుఁగువాఁడె పరతత్వవేది