ఈ పుట అచ్చుదిద్దబడ్డది
రేకు: 0258-4 లలిత సం: 09-046
పల్లవి:
విచ్చేయవయ్య నీవు వేగమె యింతటనైన
తచ్చి యిన్నియును సరిదాఁకెఁ గదవయ్యా
చ. 1:
యింతిమనోరథములు యెంచరాదు పంచరాదు
కాంతుఁడ నీకురులు లెక్కకు రానట్టు
పొంత నాకె తలపోఁతఁ బుట్టిన విరహములు
వింతగా నీశిరసున వెళ్ళెఁ గదవయ్యా
చ. 2:
చెలి చింతాలత లివి చిక్కులాయ జీర లాయ
కెలన నీరేకలు మైఁ గెరలినట్టు
అలరి యాకె మదనానలపుబొగ లెల్లాను
కులికి నీమేనఁ జుట్టుకొనెఁ గదవయ్యా
చ. 3:
సతికరములు నీసమరతులఁ బెనఁగె
రతి నీచూపులు మేన రానైనట్టు
యితవై శ్రీవెంకటేశ యిన్నిటా మీయిద్దరికి
సతమైన వలపులు జట్లాయ నయ్యా
