ఈ పుట అచ్చుదిద్దబడ్డది
రేకు: 0252-6 సామంతం సం: 09-042
పల్లవి:
పూవక పూచిన వెల్లాఁ బూఁపలయ్యీనా
చేవదేర దగ్గరక చింత లెల్లఁ దీరునా
చ. 1:
రేపు నవ్వుదువుగాని రేయి నాకొం గంటకురా
దాపుల సరములఁ దని వయ్యీనా
తీపు నీరువట్టుగొంటె తేటనేయి మందవునా
పై పైఁ గలయక యీపచ్చిచేఁత లేలరా
చ. 2:
యిచ్చక మూడుదుగాని యియ్యకొంటిఁ బో పోరా
గచ్చుల వినయములు గాకమానీనా
మచ్చిక నాఁకలివేళ మంచి విరు లింపవునా
హెచ్చినరతులఁ గాక యిందువల్ల నేమిరా
చ. 3:
అవ్వల మొక్కుదుగాని అంతేసి సేయకురా
రవ్వనిన్నుఁ జేయక నా రాఁపు వాసీనా
యివ్వల శ్రీవెంకటేశ యింతలోఁ గూడితి నన్ను
దవ్వులే చేరువ లాయఁ దలపోఁత లేలరా
