ఈ పుట అచ్చుదిద్దబడ్డది
రేకు: 0255-3 మంగళకాశిక సం: 09-027
పల్లవి:
మనసుకు మనసే మర్మము గాక
వినికివలెఁ దనకు విన్నవించఁ గలనా
చ. 1:
తలుపులో తమకము తానె యెరఁగ డట
యెలమిఁ దన్నుఁ గొసర నేలె నాకూ
కలిమిఁ జంద్రునిరాక కలువపువ్వులకును
తెలిపిరా యెవ్వరైన దినదినమునకు
చ. 2:
తప్పక వరు సెరిఁగి తానె విచ్చేయుఁ డట
యిప్పుడు విలువ నంప నేలె నాకూ
వుపతిల్లుఁ గోవిలకు నొగి వసంతకాలము
చెప్పుదురా యెవ్వరైనఁ జెలఁగి యేఁటేఁటను
చ. 3:
దగ్గరి వచ్చినవాఁడు తానె యెరుఁగుఁ గాక
యెగ్గు సిగ్గు లిటు దీర్చ నేలెనాకు
అగ్గమై శ్రీవెంకటేశుఁ డాదరించి నన్నుఁ గూడె
నిగ్గు నిలువుకు నీడ నేర్పిరా యితరులు