ఈ పుట అచ్చుదిద్దబడ్డది
రేకు: 0289-3 సాళంగనాట సం: 09-231
పల్లవి:
చేతికి లో నైనప్పుడు చెప్పేఁగాని
యేతుల సెలవి నవ్వు లీడ నేలా
చ. 1:
ముంగిట నే నుండఁగాను మోహించి చెనకేవు
అంగడిచుట్టరికాలు అవియాల
రంగుగా నీవున్నచోటు రాతిరే వింటిమి నేము
యెంగిలి పొత్తుల మాట లీడ నేలా
చ. 2:
వొంటి నే నుండఁగాను వొడివట్టి పెసఁగేవు
కంటిఁ గంటి గురుమ కత లేల
వుంటిమి నీవన్నిటాను వొరపరి వౌదువు
పెంటపట్టు సరసాలఁ బెనఁగ నేలా
చ. 3:
కదిసి నే నుండఁగానె కౌఁగిటిఁ గూడితివి
పొదుగుడువలపుల పొదు లేల
అదివొ శ్రీవెంకటేశ అన్నిటాఁ జొక్కితి నేను
అదనైనప్పుడె జోహా రన నేలా