ఈ పుట అచ్చుదిద్దబడ్డది
రేకు: 0284-5 సామంతం సం: 09-203
పల్లవి:
నేనే యెరుఁగుదును నీవూ నెరుఁగుదువు
పూనిన రుత్తమాటలు భూమి నెన్నిలేవురా
చ. 1:
తలఁచినట్టె నీవు దగ్గరి విచ్చేసితివి
వలపు లంటె నిటువలె నుండురా
సొలసి నేఁ జూడఁగానె చూచితివి నీవు నట్టె
యెలమి లోలోని యాస కిది దిష్టాంతమురా
చ. 2:
ననిచి నానవ్వులు నీనవ్వులు నొక్కటాయ
యెనసిన యింపులకు నీగురుతేరా
వొనర నిద్దరికిని వొక్కమాటే పులకించె
తనువు లొక్కటౌటకు తారుకాణ లివిరా
చ. 3:
రాణించి నేఁ గోరినట్టే రతి నీవు సేసితివి
ప్రాణము లెరవుగాని భావ మిదిరా
జాణవు శ్రీవెంకటేశ జంటవాయ మిద్దరము
నాణెపు వేడుకలెల్ల నాకు నీకె తగురా
