ఈ పుట అచ్చుదిద్దబడ్డది
రేకు: 0284-3 పాడి. సం: 09-201
పల్లవి:
ఇట్టి నీకు వలచిన యింతిదె జన్మముగాదా
వట్టి మోహించినవారి భాగ్యమవె కావా
చ. 1:
నీవు మన్నించేటి యట్టి నెలఁతల కెల్లాను
తావుల లీలారవిందమవె కావా
భావింప నీచూపులు వారినవారి కెల్లా
ఆవటించి మెడకంఠహారమవె కావా
చ. 2:
కప్పురపు బళ్లందిన కాంతలకెల్లాను(?)
కప్పిన శిరోవణికమమె కావా
చొప్పుగా నీపాదాలు సోఁకినవారికెల్లా
కప్పమైన ముంజేతి కంకణమవె కావా
చ. 3:
కోరి నీవు కాఁగిటిలోఁ గూడుండె సతుల కెల్లా
నారుకొన్నయట్టి నిధానమవె కావా
యీరీతి శ్రీ వెంకటేశ యెనసి నన్నేలితివి
తేరకొన నాపాలి దేవుఁడవె కావా
