ఈ పుట అచ్చుదిద్దబడ్డది
రేకు: 0284-2 బౌళి సం: 09-200
పల్లవి:
నివ్వెరగై వున్నాఁడవు నే మెంత పిలిచినా
మువ్వంక వలపులు ముంచకుండీనా
చ. 1:
సొలసి సొలసి నిన్నుఁ జూచిన యీ చెలిచూపు
నలిరేఁగి నీ మతిలో నాటకుండీనా
మలసి మలసి యిట్టె మాటలాడిన మాట
కలసి నీ మర్మాలు కలఁచకుండీనా
చ. 2:
చిమ్ముచుఁ జిమ్ముచు నింతి చెనకిన చెనకులు
కిమ్ముల నిన్నిట్టె గిలిగించకుండీనా
కమ్మరఁ గమ్మర నీతో కందువ నవ్విన నవ్వు
దిమ్మురేఁచి నీగుణము తేలించకుండీనా
చ. 3:
కరఁగి కరఁగి కాంత కాఁగిలించిన కాఁగిలి
అరమరపించి ఆయా లంటకుండీనా
యిరవై శ్రీవెంకటేశ యిద్దరి మమ్ముఁ గూడితి
గరిమ నీకిట్టె తారుకాణగాకుండీనా