ఈ పుట అచ్చుదిద్దబడ్డది
రేకు: 0278-6 వరాళి సం: 09-168
పల్లవి:
అప్పటి కప్పటి మాట లంటి మింతే
వుప్పొలి కినుమడాయ నూరకేవుండవయ్యా
చ. 1:
కంగులేక నీవొళ్లఁ గపటము లేదందువు
అంగముపై పెంజెమట లవిగోవయ్యా
వెంగలితనాన నిన్ను వెల్లవిరి సేయరాదు
అంగడింబెట్టకు పను లట్టె వుండనీవయ్యా
చ. 2:
వొద్దనున్నవారితోడ వొట్టులు వెట్టుకొందువు
అద్దము చూచుకో నీ మోమదిగోవయ్యా
గద్దించిందరిలోఁ దారుకాణలఁ బెట్టఁగరాదు
యిద్దరమే యెరుఁగుదు మిఁక నంతయేలయ్యా
చ. 3:
పలుమారు మాముందర పంతాలు నెరపుదువు
అలవిమీరే గురుతు లవిగోవయ్యా
యెలమి శ్రీవెంకటేశ యిట్టె నన్నుఁ గూడితివి
తొలఁకీని మేలు పొత్తున నుండనీవయ్యా