ఈ పుట అచ్చుదిద్దబడ్డది
రేకు: 0273-6 ముఖారి సం: 09-144
పల్లవి:
దొర వైతె నింతలోనె దోసమా యేమి
గరిమ మా వినయాలు కానివా యేమి
చ. 1:
మలసి యీడా నాడ మాట లాడకున్న నేమి
తొలుతె యింటికిరాను దోసమా యేమి
తలఁపిట్టె వుండిన దగ్గరక మానేవా
కలపుకోలుఁదనము కానిదా యేమి
చ. 2:
వడిఁ జుట్టాలముగామా వావి చెడ మందు గద్దా
కడు మమ్ము మన్నించితే కానిదా యేమి
కడకన్నులఁ దేలించి కాఁక రేఁచకున్న నేమి
తొడఁగి విడె మందితే దోసమా యేమి
చ. 3:
చేరి చేరి బుజముపై జెయి వేయకున్న నేమి
దూరక కాఁగిలించితే దోసమా యేమి
యీరీతి శ్రీ వెంకటేశ యిక్కువ నుండి కూడి
గారవించితి యిది కానిదా యేమి
