ఈ పుట అచ్చుదిద్దబడ్డది
రేకు: 0272-3 కాంబోది సం: 09-129
పల్లవి:
ఇంత చాలదా మాకు నిదినేఁడు
కంతునివోజల పెండ్లి గలిగెఁ గా నేఁడు
చ. 1:
కాంతకును నీకును కనురెప్పలె తెర
దంతపు నవ్వులె మీకు తలఁబాలు
రంతుల వూరుపలె రవళి సోబనాలు
చెంతల మీ కీ పెండ్లి చెల్లెఁగా నేఁడు
చ. 2:
ముదితకు నీకును మోవులె బువ్వములు
కదియు సిగ్గులె మంచి కమ్మగందాలు
సదరపు సరసాలె చల్లు వెదవీడేలు
యెదుదెదురనె పెండ్లి యెసగెఁగా నేఁడు
చ. 3:
వుంచపు గోరితాఁకులె వుంకువ సొమ్ములు
ముంచిన పలు సోఁకులె ముయికిముయి
యెంచఁగ శ్రీవెంకటేశ యిందిర నీ కూటములు
కంచపుఁ బెండ్లి మీకుఁ గలిగెఁగా నేఁడు