ఈ పుట అచ్చుదిద్దబడ్డది
రేకు: 0271-6 సామంతం సం: 09-126
పల్లవి:
విన్నవించనేల యిందు వేమారుఁ దనతో
యెన్నిక నేఁ జేసేదేమి యిఁకఁ దనచిత్తము
చ. 1:
చెప్పరాని చూపరాని చిత్తములో మర్మము
అప్పసము నాలోని అడియాస యిదిగో
కప్పియుఁ గప్పగరాని కన్నులలో మర్మము
దప్పి దేరిచే చక్కని తనరూపె పో
చ. 2:
పట్టియుఁ బట్టఁగరాని పాయములో మర్మము
ముట్టుపడ్డ పతిమీఁది మోహ మిదిగో
కుట్టియుఁ గుట్టఁగరాని కుచముల మర్మము
పొట్టఁ బొరుగున రేఁగే పులకలు వో
చ. 3:
అందియు నందఁగరాని ఆయముల మర్మము
సందడిఁ బరవశాల సంగతిదివో
కందువ శ్రీవెంకటేశుఁ గలసిన మర్మము
గొందినె యీతని గోరిగురుతులె పో