ఈ పుట అచ్చుదిద్దబడ్డది
రేకు: 0014-2 నాదరామక్రియ సం: 05-080
పల్లవి:
చెలియకు విరహపు వేదన సేయని సింగారంబిది
సొలవకు వలపుల ముద్రల చొప్పులు మాపకుఁడీ
చ. 1:
కిక్కిరిసిన చనుగుబ్బలు గీఁటిన బగిలెడి నయ్యో
పక్కనఁ గనుకలి దాఁకీ బయ్యెద దెరవకుఁడీ
వెక్కసమగు ముఖకాంతికి వెడవెడ మరుఁగై తోఁచెడి
చెక్కుల చెమటలు గందెడి చేతులు వెట్టకుఁడీ
చ. 2:
అంగన మేనికిఁ బులకలు అడ్డము దోఁచెడి నయ్యో
బంగరు మొలకలవంటివి పైపైఁ దుడువకుఁడీ
తొంగలి రెప్పల కెలఁకుల తొరిగెడి కన్నుల మెరుఁగుల
ముంగిటవేసిన చూపుల మురిపెము మానుపుఁడీ
చ. 3:
తిరువేంకటపతినింతికి దెచ్చెదమనఁగా నయ్యో
కరుణించినవాఁడాతఁడె కళవళమందకుఁడీ
తరుణీమణి మా దేవునిఁ దగఁ గౌఁగిట సౌఖ్యంబులు
పరవశమందినదేమో పలుమరుఁ బిలువకుఁడీ
