ఈ పుట అచ్చుదిద్దబడ్డది
రేకు: 0013-3 ఆహిరి సం: 05-076
పల్లవి:
మచ్చికల మొగసిరి మందులాఁడ నీ-
కిచ్చిన దేహమిది యెట్టయినఁ జేయరా
చ. 1:
ఓడక యెక్కడనైన నుండి నీవు
వేడుకతో మాయింటికి విచ్చేయఁగాను
వాడుమోముఁ జూచి నవ్వువచ్చుఁ గాని కోప-
మేడఁ దెచ్చుకొన్నరాదు యెట్టైనాఁ జేయరా
చ. 2:
ఎంతవొద్దు వోయియైనా యిటునీవు
వింతలేక మాయింటికి విచ్చేయఁగాను
చింతతో నీ కెదురు చూచితి గాని
యెంతైనాఁ బాయలేను యెట్టయినాఁ జేయరా
చ. 3:
కుంకుమచెక్కుల మెఱుఁగులతోడ తిరు-
వేంకటేశ మాయింటికి విచ్చేయఁగాను
వంకటాడి నినుఁ గూడవలెఁగాని
యింక నిన్నుఁ బాయలేను యెట్టయినాఁ జేయరా
