ఈ పుట అచ్చుదిద్దబడ్డది
రేకు: 0095-2 శ్రీరాగం సం: 05-379
పల్లవి:
ఇప్పుడెట్లున్నదో యిందువదన
అప్పటికిఁ గొంత గుణమాయ నావేళ
చ. 1:
తెఱవ శశికాంతవేదికమీఁద మలఁగుపై -
నొఱగి పరితాపాగ్నినుడుకఁ గాను
నెఱి దొలఁకు మోమువెన్నెలకు శశికాంతంపు -
టఱఁగు గరఁగిన శైత్యమాయెనావేళ
చ. 2:
చెలియ పొన్నల విడ చిగురుఁబానుపుమీఁద
పలుమారు నినుదూరి పాడఁగాను
చెలఁగి పొన్నల విరియు చిలుకుఁదేనెల సోనఁ
దెలివొంది కొంత వడదీరెనావేళ
చ. 3:
తొయ్యలి విలాసమున తఁగు మంచముమీఁద
పయ్యెదరజార నినుఁ బాడఁగాను
తియ్యమునఁ గూడితివి తిరువేంకటేశ్వరుఁడ
నెయ్యంపు వేడుకలు నినిచెనావేళ