ఈ పుట అచ్చుదిద్దబడ్డది
రేకు: 0093-5 శుద్ధదేశి సం: 05-372
పల్లవి:
మొలనూలి గొల్లెత మురియుచును
వలవంతఁ దిరిగీని వాడవాడలను
చ. 1:
సంపెఁగలతురుముతో చల్లలమ్మీనిదివొ
పంపుమోము గొల్లెత వాడలను
యింపులకోరికె తో నిందిరాపతి యెదుట
జంపుల నటనలతో సాళగింపుచును
చ. 2:
నొసలికస్తూరితోఁ గన్నుల నవ్వీనిదివో
పసివాడు గొల్లెత వాడలను
కసరుచు హరిమీఁదికాఁకల కోపముతో
యెసరుఁ జెమట గోర యెమ్మెలఁ జిమ్ముచును
చ. 3:
చెలువంపుటుంగరాల చెయి వీచీనిదివో
వలపుల గొల్లెత వాడలను
కలికియై తిరువేంకటవిభుకౌఁగిట
అలసిన నటనల నల్లంతనేఁగుచును