ఈ పుట అచ్చుదిద్దబడ్డది
రేకు: 0089-6 ముఖారి సం: 05-349
పల్లవి:
చెప్పిన హృదయము దలఁకెడు చెలి దానిపుడెట్లున్నదొ
అప్పుడు పరితాపంబున నలసిన చందములు
చ. 1:
వేడుకతో సంగీతము విని కన్నుల మెచ్చుచు-
నాడుచుఁ బ్రాణేశ్వరుఁగొనియాడెడి చందములు
కాడిన మర్మపుమాటల కంపంబునఁ దలయూఁపుచు
చూడక చూచిన చూపుల చొక్కెడిచందములు
చ. 2:
చనుఁగవ సన్నపు చెమటలు జారెడి పయ్యెదనార్చుచు-
నొసరిన నిట్టూర్పులచే నూటాడెడి చందములు
తనువునఁ బలుమరుఁ బొడమెడి దట్టపు పులకాంకురములు
అనువున మెత్తక కరమున నంటిన చందములు
చ. 3:
తిరువేంకటగిరివల్లభు దేవశిఖామణికౌఁగిట
తరుణి మనోభవుబారినిఁ దప్పిన చందములు
యిరవుగ నాతని చేఁతలు నింపగుఁ బరవశములచే
దొరలిన మరపుల నెరుకలఁ దూలెడి చందములు