ఈ పుట అచ్చుదిద్దబడ్డది
రేకు: 0089-1 శ్రీరాగం సం: 05-344
పల్లవి:
అటు గొంతకాలంబులనుభవించఁగఁ గలిగె
యిటు గొంతకాలంబు యివి చూడవలనె
చ. 1:
వెన్నెలలుఁ జీఁకట్లు వెలఁది సుఖదుఃఖములు
కన్నుదెరచి మూయుటలు గతులు నవగతులు
మన్ననలు వొల్లములు మగువ పగలును రేయి
తన్నుఁదానె సమకూడుఁ దనుఁదానె తొలఁగు
చ. 2:
కిందు మీఁదైవచ్చుఁ గినుకలును దాలిములు
ముందు వెనకగుఁ జెలియ మోదఖేదములు
పొందికలు పాయుటలు పొలఁతి సౌభాగ్యములు
ఇందరికి సరిగాఁగ నెదురెదురనుండు
చ. 3:
మరచినను తలఁచినను మనసు తనపైనుండు-
టెరుఁగునది తిరువేంకటేశ్వరుండు
తెరవనిదె కరుణించె దేవుఁడే నాయకుఁడు
తరితీపుసేయుఁ గాని తలఁపులోనుండు
