ఈ పుట అచ్చుదిద్దబడ్డది
రేకు: 0087-2 శ్రీరాగం సం: 05-333
పల్లవి:
విరహంపుఁ గోమలికి వెలయంగఁ గలవెల్ల
అరుదుగాఁ బండి పొల్లయిన ఫలమాయె
చ. 1:
వేమారుఁ జెలికి నరవిందశయ్యలె పరవ
బాముచెడి యిందునే బడలెఁ గాని
తామెరై డెందమీ తలిరుదేహములోన
లేమకిది గలిగియును లేని ఫలమాయె
చ. 2:
వెలఁదిమై సురటులనె విసరఁగా లలితాంగి-
నలమి అదియే తాపమయ్యెఁగాని
పెలుచైన నిట్టూర్పు పెనుగాలి లోలోనె
కలిగియును తమవారుగాని ఫలమాయె
చ. 3:
కాంత కనుదోయి నునుఁగలువలై కలువలనె
అంతకంతకు వగల నలపెఁ గాని
యింతలోఁ దిరువేంకటేశుఁ గూడియుఁ జెలికి
చెంతనే కనుదోయి చెంగలువలాయె
