ఈ పుట అచ్చుదిద్దబడ్డది
రేకు: 0065-4 ముఖారి సం: 05-202
పల్లవి:
కలిసి కాఁకలఁబెట్ట కనుసన్నలనె తిట్ట
చలపట్ట నీకుఁ జెల్లే జాణఁడే యతఁడు
చ. 1:
పగటుగుబ్బలురాయ పసిఁడి మట్టెలు మ్రోయ
నగవువెన్నెల గాయ నడచేవు
వగ నిన్ను భ్రమయించ వలపువారిధి ముంచ
జగడాలు వచరించ చతురుఁడే యతఁడు
చ. 2:
చూపులనె పగచాట సొబగులఁ గనుగీఁ టఁ
దీపు పైపైమీఁటఁ దిరిగేవు
కోపగింతలనేఁప కూరిములు పైఁజాఁప
రావులు పెరరేఁప రసికుఁడే యతఁడు
చ. 3:
సందుల దండలు జార జవ్వాదిచెమట గార
నందములు దైవార నలసేవు
కందువుల నినుఁగూడి కరఁగి సిగ్గులు వీడి
విందై నీతోడుతనాడే వేంకటేశుఁడితఁడు
