ఈ పుట అచ్చుదిద్దబడ్డది
రేకు: 0065-1 కాంబోది సం: 05-199
పల్లవి:
కూరిములే కదవమ్మ కోపమయ్యీని కడు-
భారమైన పోటుగాదా పచ్చిదేరే పలుకు
చ. 1:
పున్నమచందురుని తోఁబుట్టుగైన నీమోము-
వెన్నెలలే కదవమ్మ వేఁచఁజొచ్చీని
పన్నిన పగల వెలుపటివారికంటెను
ఎన్నరాని పగగాదా యింటిలోని పోరు
చ. 2:
చిత్తజుని జనియించఁ జేసే మొక్కలపు నీ-
చిత్తమిదే కదవమ్మ సిగ్గు వాపీని
మిత్తివలెఁ జెలరేఁగి మీఁదఁగానే యెండకంటే
నెత్తిమీఁదిచిచ్చుగాదా నీడలోని యెండ
చ. 3:
కట్టఁగడ చందనపుగాలికి మీరిన నీ-
నిట్టూరుపులేకావా నిగ్గుదేరీని
యిట్టె యివె తిరువేంకటేశుఁగూడఁ బట్టి నీకు
చుట్టపుఁ బగలే మంచిచుట్టములైనవి
