ఈ పుట అచ్చుదిద్దబడ్డది
రేకు: 0063-5 శ్రీరాగం సం: 05-191
పల్లవి:
చలిగాలి వేఁడేల చల్లీనె కప్పురపు
మలయజము తానేల మండీనే
చ. 1:
పాపంపు మనసేల పారీనే నలుగడల
చూపేల నలువంకఁ జూచీనే
తాపంపుమేనేల తడవీనె పూవింటి-
తూపేల చిత్తంబు దూరీనే
చ. 2:
వాయెత్తి చిలుకేల వదరీనె పలుమారు
కోయిలలు దామేల గొణఁగీనే
రాయడికి నలులేల రాసీనె మాతోను
కాయజుఁడు తానేల కసరీనే
చ. 3:
ఏకాంతముననేల యెదురైతినే తనకు
లోకాధిపతికేల లోనైతినే
చేకొనిదె మన్నించె శేషాద్రివల్లభుఁడు
పైకొనిదె మమ్మేల పాలించెనే