ఈ పుట అచ్చుదిద్దబడ్డది
రేకు: 0062-3 శ్రీరాగం సం: 05-183
పల్లవి:
చెల్లఁబో అలుగ నేఁడు సిగ్గుగాదా
వొల్లని వీనిఁ బాసి వుడికి నామనసు
చ. 1:
పొలసి యీ ప్రాణమిట్టే పోయినాఁ బోయఁ గాక
తలవంపు సేసే యీ తను వేఁటికే
కలసియుఁ గలయని కఠిచిత్తుని వీని
సొలసి కమ్మరఁ జూచీ నా మనసు
చ. 2:
మరుతాపమున మేను మాఁడిన మాఁడెఁగాక
పరులబారికిఁ జిక్కే బ్రదుకేఁటికే
విరహన నొకతెవై వేదనఁ బొరలు వీని-
కరుణలే కోరీని కష్టపు నామనసు
చ. 3:
సడిఁబెట్టి వయసిట్టే చంపినఁ జంపెఁ గాక
వడిఁ బెట్టి వేఁచే నావయసేఁటికే
కడు జాణఁడైన వేంకటగిరీంద్రుఁడు వాని-
వొడలు సోఁకిన నిట్టే వుబ్బెడి నామనసు
