ఈ పుట అచ్చుదిద్దబడ్డది
రేకు: 0024-2 సామంతం సం: 05-133
పల్లవి:
కొనచూపులనె వింతకోరికలు దైవార
పెనగొన్న తమకములఁ బెనఁగు టెన్నఁడురా
చ. 1:
కమ్మ కస్తూరితావి కప్పురపువాసనల-
తమ్ములము నోరిలోఁ దగఁ గులికి కులికి
ఉమ్మగింతల రతులనుడివోని వేడుకల
ఇమ్ములను గడి సుఖియించు టెన్నఁడురా
చ. 2:
బిగువుఁ గౌఁగిటఁ జేర్చి బిత్తరపుఁ జూపులను
నగవు దేరఁగ మనసు నాఁటించి మించి
మొగము మొగమునఁజేర్చి ముద్దుమాటలను నునుఁ-
బగడవాతెర గదలఁ బలుకు టెన్నఁడురా
చ. 3:
కడు మోహమున సిగ్గు గదియు టెన్నఁడు లేక
యెడలేని కూటముల యెచ్చరిక లేక
విడువకిటువలెనె తిరువేంకటేశుఁడ నీవు
వడిఁదలఁచి నాకడకు వచ్చుటెన్నఁడురా