ఈ పుట అచ్చుదిద్దబడ్డది
రేకు: 0022-3 వరాళి సం: 05-122
పల్లవి:
కటకట సతిశృంగారము కన్నులపండువు దోఁపుచు
యిటువలె నిలిచి చిత్తంబిందరినేఁపెడిని
చ. 1:
కోమలి కొప్పున జెరివిన క్రొవ్విరులాత్మజు శరములు
వేమరుఁ బొదిగొన నాఁటిన విధమున నొప్పెడిని
కామిని పూసిన కస్తూరి కంతుని బాణారుణిమే
యీమైఁ బైపైఁ బేరిన యిటువలె నొప్పెడిని
చ. 2:
అతివకు భూషణజాలంబంతయు మరువస్త్రములకు
జతనంబగు మైమరువై సరిఁ జెలువొందెడిని
సతి గట్టన వెలిపుట్టము చంపెడు మదనుని బారికి
సితకరుఁడడ్డము చొచ్చిన చెలువము దోఁపెడిని
చ. 3:
బలుపగు చెలిచనుగుబ్బలపై వేంకటపతి నించిన-
లలితపు రేఖల బిత్తరిలాగులు దోఁపుచును
వలరాయని చిరునమ్ములు వడిఁదాకిన గంట్లవలెఁ
బొలుపుగఁ జూచినవారల బొమ్మరపరపెడిని