ఈ పుట అచ్చుదిద్దబడ్డది
రేకు: 0021-4 కన్నడగౌళ సం: 05-117
పల్లవి:
రమణి సురటిగాఁ జెరఁగు వీచీని
చెమరించెనంటాఁ జెలి దూరీని
చ. 1:
కలగంటినంటా కాటుకకనుల నీరు
వొలకఁగా మలగు పై నుసురనీని
తల నొచ్చీనంటా దంతపుటోవరిలోన
పలుకదు పిలిచినాఁ బవ్వళించీని
చ. 2:
తొలఁగితినంటా తూఁగుమంచముమీఁ ద
సెలవినవ్వులతోడ శిరసూఁచీని
అలసితినంటా నలరుఁబానుపుఁ మీద
పులకలమేనితోఁ బొరలెడిని
చ. 3:
సొరిగితినంటా సురతపరవశాన-
నరవిరి కనురెప్పలల్లాడించీని
తిరమాయనంటాఁ దిరువేంకటేశ్వరుఁ
దరుణి గలసి యింకాఁ దమకించీని
