ఈ పుట అచ్చుదిద్దబడ్డది
రేకు: 0018-6 పాడి సం: 05-107
పల్లవి:
చక్కని తల్లికి చాఁగుబళా తన-
చక్కెరమోవికి చాఁగుబళా
చ. 1:
కులికేటి మురిపెపు గుమ్మరింపుఁ దన-
సళుపుఁ జూపులకు చాఁగుబళా
పలుకుల సొలపులఁ బతితోఁ గసరెడి-
చలముల యలుకకు చాఁగుబళా
చ. 2:
కిన్నెరతోఁ బతి కెలన నిలుచుఁ దన-
చన్ను మెఱుఁగులకు చాఁగుబళా
ఉన్నతిఁ బతిపైనొరగి నిలుచుఁ దన-
సన్నపు నడిమికి చాఁగుబళా
చ. 3:
జందెపు ముత్యపు సరులహారముల -
చందనగంధికి చాఁగుబళా
విందయి వేంకటవిభుఁ బెనఁచిన తన-
సందిదండలకు చాఁగుబళా