ఈ పుట అచ్చుదిద్దబడ్డది
రేకు: 0238-1 బౌళి సంపుటం: 08-223
పల్లవి:
నీతోనేల దూతికకు నిష్టూరము
ఆతరుణి వచ్చి మరి అన్నిఁజూచుకొనీని
చ. 1:
యిప్పుడేలకోపించేవు యింతితో నొకమాఁటు
చెప్పుమన్న మాఁటలాపె చెప్పెఁగాక
తప్పులేదు నీయందనీ దానికైనా సంతోసించు
ముప్పిరిగాఁ గలవెల్లా ముందరనయ్యాని
చ. 2:
గద్దించనేల నీకు కామినిని వేళచూడ
వద్దికిఁ బొమ్మనగాఁను వచ్చెఁగాక
సుద్దుల నీకులోనయ్యీ చుట్టము జేసుకోయిఁక
తిద్దుకొనేవారు గల్తే తేరిఁ దగవులు
చ. 3:
వాదులాటలేల నీకు వనిత నీగుణమిట్టె
సోదించి రమ్మనఁగాను సోదించెఁగాక
యీదెసఁ గూడితివి నీవింతలో శ్రీవెంకటేశ
పోదిగా నాపెఁగూడె పొసఁగె నీపొందులు
