ఈ పుట అచ్చుదిద్దబడ్డది
రేకు: 0237-4 శ్రీరాగం సంపుటం: 08-220
పల్లవి:
ఊడిగాలు సేసుకొంటా నుండనీవయ్యా
దాడివెట్టినిన్నుఁ బట్టేదాన నీకుఁబ్రియమా
చ. 1:
చెప్పినట్టె యెపనైనాఁ జేయఁగాఁ గొంగు వట్టేవు
వుప్పటీంచె యీపనైతే నోపఁగలనా
ముప్పిరిగొన్నసతులు ముయ్యీడువారున్నారు
తప్పులు నిన్నుఁ బట్టేటి దానను నేఁబ్రియమా
చ. 2:
లోనైనీకు నుండఁగాను లోనింటికిఁ బిలిచేవు
కోనల నిందుకు నియ్యకొనఁగలనా
రానిపోని మూలలను రాణివాసాలున్నవారు
తానకమై మారుకొనేదాన నీకుఁబ్రియమా
చ. 3:
గందము నీకుఁ బూయఁగాఁ గాఁగిలించి కూడితివి
అందుకొని యింత అలయఁగఁ గలనా
యిందుకే శ్రీ వెంకటేశ యిదే గోపికలున్నారు
దందువంటి రాజపుదాన నీకుఁ బ్రియమా