ఈ పుట అచ్చుదిద్దబడ్డది
రేకు: 0224-1 హిందోళవసంతం సంపుటం: 08-139
పల్లవి:
చెల్లునయ్య నీవు నాకుఁ జేసే చేఁత
యెల్లవారిలోన నిది యెక్కుడా నాకు
చ. 1:
చనవిచ్చితివి నీవు చలము నే మానితి
యెనసి వేఁడుకొనేవు యెక్కుడా నాకు
పెనఁగితివిట్టే నేఁడు బిగువులు సడలితి
యినుమారు పంతమిచ్చేవెక్కుడా నాకు
చ. 2:
పయ్యద నీవంటితివి పనులకు లొనైతి
యియ్యరాని బాసయిచ్చే వెక్కడా నాకు
నెయ్యము పై వేసితివి నీవే నేనై యుంటి
యెయ్యడ చూచినా నవ్వేవెక్కుడా నాకు
చ. 3:
కందువ దెలిపితివి కాఁగిలించుకొంటెనిన్ను
యిందర మెచ్చ మన్నించే వెక్కుడా నాకు
కందర్పగురుఁడ శ్రీ వెంకటరాయ కూడితివి
యింద నందూనేలితివెక్కుడా నాకు
