ఈ పుట అచ్చుదిద్దబడ్డది
రేకు: 0056-3 ఆహిరి సంపుటం: 06-087
పల్లవి:
ఇన్నియును దగఁగలిగె నీయింతి కిదె యిపుడు
కన్నియల కిందరికిఁ గలిగె మోహములూ
చ. 1:
నిగనిగని మెఱుఁగు వెన్నెల మోమునకుఁ గలిగె
చిగురుమోవికిఁ గలిగెఁ జిఱునగవులు
పగటుఁగనుఁగొనలఁ బలపలని కెంపులు గలిగె
పొగరుఁజెమటలు గలిగె పొలఁతిచెక్కులను
చ. 2:
ఒయ్యార మగు నలపు లువిదమేనికిఁ గలిగె
గయ్యాళి నడపులకుఁ గలిగె మురిపెములు
తొయ్యలికిఁ గలిగె సంతోషంపుఁ బరవశము
పయ్యెదకుఁ గలిగెఁ బయిపైని నునుఁబూఁత
చ. 3:
వెలఁది కిప్పుడు గలిగె వేంకటేశ్వరు కరుణ
తలఁపులకుఁ గలిగె చింతా వియోగంబు
పులకలకుఁ గలిగెఁ దలఁపులలోని జొంపములు
అలుకలకుఁ గలిగెఁ బాయని విలాసములు