ఈ పుట అచ్చుదిద్దబడ్డది
రేకు: 0054-6 భూపాళం సంపుటం: 06-078
పల్లవి:
నిండిన యాసల యెండ నీడలాయె నేఁటికే
బెండువడ్డ మేనుఁదీగె బీరువోయెనేఁటికే
చ. 1:
నుదురైనశశి నీచన్నుల కేల జాఱెనె
చెదరి నీముత్యాలు చెక్కుల కే లెక్కనే
ముదిత నీతో సిగ్గు ముంగి లేల వెళ్లెనే
నిదురమానిన మోము నిగ్గులేల తోఁచెనె
చ. 2:
బచ్చన నీ సింగారము బయలేఁటికాయెనే
ముచ్చట నీ మాటలకు ముసుగేల జాఱెనే
వెచ్చిన నీ మేని సొంపు వింతదోఁచె నేఁటికే
మచ్చిక నీకోరికలు మదమెక్కె నేఁటికే
చ. 3:
చూపులు వెన్నెలమించుఁ జూరలాడె నేఁటికే
కోపపు నీజంకెనలగొనబాయె నేఁటికే
ఏపుమీఱి తిరువేంకటేశుఁ గూడి నీకుఁ
దాపలైనతలఁపులు దరిచేరె నేఁటికే