ఈ పుట అచ్చుదిద్దబడ్డది
రేకు: 0042-4 కాంబోజి సంపుటం: 06-004
పల్లవి:
ఆరగింపవో మాయప్ప యివే
పేరిన నేతులు పెరుగులును
చ. 1:
తేనెలు జున్నులు తెంకాయ పాలును
ఆనవాలు వెన్నట్లును
నూనె బూరెలును నురుగులు వడలును
పానకములు బహు ఫలములును
చ. 2:
పరమాన్నంబులు పంచదారలును
అరిసెలు గారెలు నవుగులును
కరజికాయలును ఖండమండెఁగలు
పరి పరి విధముల భక్ష్యములు
చ. 3:
కడు మధురంబగు కమ్మఁబూరణపుఁ
గుడుములు నిడ్డెన కుడుములును
సుడిగొనునప్పాలు సుకినప్పాలును
పొడి బెల్లముతోఁ బొరఁటుచును
చ. 4:
కాయపు రుచులకు గనియగు మిరియపుఁ
గాయలు నేలకి కాయలును
పాయరానియంబాళపుఁగాయలు
నాయతమగు దధ్యన్నములు
చ. 5:
ఒడికపుఁ గూరలు నొలుపుఁబప్పులును
అడియాలపు రాజాన్నములు
బడిబడిఁ గనకపుఁ బళ్లెరములతోఁ
గడు వేడుక వేంకటరమణా