ఈ పుట అచ్చుదిద్దబడ్డది
రేకు: 0042-3 ముఖారి సంపుటం: 06-003
పల్లవి:
రమణి నేర్పు నేరములాయె
జమళివిధుల సరసపు విభుఁడా
చ. 1:
తెఱవకు నంపిన తెల్లని కలువలు
మఱపున కెందామర లాయె
నెఱుఁగము నీవిపు డింతచేతువని
కఱతలకలికివి గా విభుఁడా
చ. 2:
మగువకు నంపిన మకరంద మిచ్చటి
జిగి దొలంకేటి చిఱుచేఁదాయె
అగు నీ యెకసక్యమ్ముల మాటల
వగ నెఱజాణండవా విభుఁడా
చ. 3:
చెంతల ముత్యపుం జిప్పల తోయము
లంతలోనె ముత్యములాయె
సంతత కరుణా జలనిధి లక్ష్మీ
కాంతుఁడవఁట వేంకట విభుఁడా
